Tatinggal Saikung

HANYAR tadi Palui umpat babisnis wasi bakas sampai ka Jawa sana. Buliknya inya bakulihan duit banyak.
"Kanapa Lui maka babisnis wasi bakas sampai ka Jawa sana?" ujar Garbus manakuni.
"Bisnis wasiku ini lain nangkaya bisnis wasi biasa Bus ai. Tapi bisnis wasi ganal yaitu manukari kapal tuha, lalu dirahai wasinya hanyar imbah itu dijual bacurai atawa bakilu," ujar Palui.
"Amun bisnis ganal baarti ganal jua uncuinya lah Lui?" ujar Tulamak umpat bapander.
"Alhamdulillah kawa haja gasan hidup satangah tahun kada bagawian," ujar Palui baagak.
"Baarti kawa haja mambayari kami makanan. Kabalujuran parutku galurukan pulang Lui ai, kita singgah satumat ka warung acil Jumrah," ujar Tulamak.
"Jangankan ka warung acil Jumrah, ka warung ganal haja aku bayari," ujar Palui lalu mambawai kakawalannya masuk ka warung nang bajual hayam. Imbah baduduk lalu Palui mangiyau panjaganya.
"Nang, kami minta sangakan hayam kampung saikungan, manyanganya dikaringi supaya masak bujur," ujar Palui mamasan makanannya.
Kada lawas makanannya datang, tapi wayah babasuh tangan basasiap handak makan, sakalinya panjaga nang lain datang.
"Lui... ui Lui, ampun maaf Lui lah, sakalinya ada tasalah paham," ujar panjaga itu. "Hayam nang ini sakalinya gasan sidin nang ganal awak di hujung sana, karna sidin datang badahulu wan kabalujuran hayam ini tinggal saikungannya haja lagi. Maaf Lui lah," ujar panjaganya sambil manunjuk ka urang ganal basar hibak wan tato nang duduk di hujung warung.
Palui, Garbus wan Tulamak manulih ka urang nang duduk di hujung itu. "Karna sudah talanjur dijulung ka sini, jadi hayam ini jadi ampun kami," ujar Palui mangarasi.
"Baiknya bakalah haja Lui ai, daripada jadi takalahi kaina," ujar Garbus takutan.
"Hi-ih, labih baik mamasan nang lain haja. Diganti wan iwak kada apa-apa jua," ujar Tulamak gaer jua.
"Kada kawa, karna kita sama-sama babayar jua," ujar Palui tatap sambil handak mamatah halar hayam.
Panjaga warung tadi kabingungan. Kada lawas urang ganal basar tadi lawan muha sarik mandatangi Palui sambil mancabutakan parang.
"Kalu ikam mamatahakan halar hayam itu maka aku patahakan jua tangan ikam. Amun ikam mamulas pahanya, paha ikam kupulas jua," ujar urang ganal basar tadi. "Pokoknya apa haja nang ikam gawi wan hayam itu, aku gawi jua ka awak ikam," ujarnya pulang.
Palui tahinip satumat, lalu kada lawas diambilnya hayam tadi, diangkatnya bagamat lalu dijilatinya buritnya. Malihat Palui manjilati burit hayam, urang tadi tapakalah saurang lalu bajauh kada saling padahan. (bpost/ivanda)